Wednesday, January 25, 2012

Aizawl Pictionary

Tikhian a hming ka han phuah ve ringawt mai a, in ngaihdan erawh a dang mai thei. Reilote chhung aizawl ka cham laia ka vah kual vel na lama ka thlalak thenkhat hi lo en ve teh u. Thiapril tan chuan dawn a tisei maithei a ni. Thlirna tlang hrang hrang a thlir theih a ni a, lo thlir ve leh phawt mai teh u.




IT khawvelah kan zuanglut a, hetiang tower hi a tam ta hle mai. Hei hi inchhawng 4
a sang chung a awm a ni. In an sak lai khai hetiang load la tur hian an ruahman tel angem. Rikrum thilah eng ang tak ang maw te ka tia. Radiation hazards chu thudang ni ta sela.




Martarte thlanmual. Sum tam tak senga siam a ni ngei ang.
Tlawhtu an tlem hle a, visitors log book pawh enkawl loh a nih hmel.
Mizo nationalism tan a hmun hlu leh pawimawh, mitin ten a kan tlawh ngei atan
a duhawmah ka ngai. A awmna hre lo pawh kan la tam ka ring!




Lei tlahniam: A tlakhniam chhan hre eng ang mah ila, kumhlun
tur kawng siam a har tlat si. A helna ngaihtuah a ngai a ni mai lo maw.
Sum hnar tha tak erawh a ni an ti.




Zarkawt traffic point atanga High school field pan chhohna kawng
chhak lama hmawng zung inzam chiat. mawi ve angreng tak a ni.
Humhalh tlat chi a ni ta ve ang. Vengchhung a ti mawi tlat.




Awi ka rei!, tiin ka vai thian chuan a thlir vawng vawng. Thinthi chuan
fur khawchhe hnuaiah pawh zanmu chu an chhing a ni ngei awm si a.
A in neitu tak tak te hi an cheng ve em le te ka tia?




Khitiang a AIZAWL sipel ziak dik lo khi phailam kaihhnawih thil fakna
tarchhuahah khian hmuh tur a tam ta riau mai. Vei tham a tling tlat! mahni
vengah theuh siam tha turin hma han la ta mai ila.




Kan kawng te hi a chhuk chho in a kual kawi nasa si a, phai lam motor
lian leh sei, phur rit tak tak an tlan ve pur pur bawk sia, khitiang ang
khi hmuh tur a awm ta fo mai.


Kha te mai kha a ni e. Duh duh sawi a thiang e.

...khrum


Sunday, January 22, 2012

Hriselna leh Ei tha

Tunlai chu, zoram han chuanchhuah takah chuan AIR FM Lunglei ka ngaithla thin a, delhi phai lam atanga hriselna lam programme, mizo tawng thluk nalh 'deuh deuh' a an rawn tihchhuah thin zing karah ka ngaithla bawk thin. Hriselna leh eitha an ngai pawimawh a, ngaih pawimawh awm reng pawh a ni. Ka post hian chu nen chuan inkungkaihna chiah nei lo mahsela, a pawimawhna tih lan thar nan ti khian a hming ka han phuah ve leh tawp mai a ni.

Nia hrisel tur chuan ei that a pawimawh a, ei tha tih han thih khan zu tha leh sa tuihnai mai a ni lo. Kut hnathawtu in a rim taka a tharchhuah thlai leh hnah hring te leh thei rah te hi chaw tha chu an ni tih kan hai awm lo ve. Mizote pawh a taima fal leh dawn thui deuh te chuan huan ram siam in rim taka thawk in thlai thar duh anga fresh lei tur thahnem tak an tharchhuak ve ta a nih hi. Heng te hi ei tam hi intihhmuh hi a tha hle ang. Thawk rim leh taima te chu sawrkar pawh in a duhsaka, an hmalaknaah nasa takin a pui ni ngei tur a ni.

Hmanni chu Saikuti Hall, Lungleiah agriculture leh a behbawn hmalakna te entirna a awm a, ka va kal ve a. A hmun a uap deuh bawka thlai leh thei te chawhnu lamah chuan an lo uai deuh tawh na a, an itawm hle tho mai. Kut hnathawktute thawhrimna rah hian kan ram a dinchhuahpui thei angem tih chu chhan ka tum lo. Kan ramah hian a tumruh zual te tan chuan huan thlai siam hian hrawk erawh a chawm theih ka ring. Heng thlai thar te hi an hrisel hmel hle, hriselna leh eitha kan ti bawk a, ei teuh teuh mai tur. Thil entir thenkhatte hi lo thlir ve mai mai ta che u.

















A Hmun, Saikuti hall. Meizuk an khap tih pawh a lan khi, hriselna lam kawngah chuan nasa takin kan pen zawng a ni ngei mai. Thlalak hnuai lamah hian 'chhip sen nei' pawh an awm tih kan hmu thei awm e.






















Buh chi hrang hrang an lo pho lang a, hmui tak tak te pawh a awm ve ngei ang. Thermocol thleng a pho lo in thlangra emaw han hmang ngei mai sela chuan a thlir a nuam lehzual ngei ang le.


















Chawhmeh tur atan zikhlum. A lian tha thawkhat khawp mai, tehfung atan ka pen pai lai chu a bulah kan thal ve thla rawk a.
















Sa tel lo chuan chawei a tui tak tak lo aniang! Ram pawn lam atanga chawk luh vai ar leh thlahpawlh ar dazat hi kan uar ta hle. An than a tha a, an puitling hma, sa pawh a hlawk nge nge. Paikawng a chhin erawh khi chu kawl-ar a ni in ka hria. Ti lo deuh khian ar te khi ar-chhiarah dan ta zawk se te ka ti a.






















Chawhmeh bawk. Pu Caribou an mai that zia han ziak teh se.




















Salad atan a itawm hle. Hetiang hian kan thil eiah roughage a siam a, pumpui eh ril tan a tha an ti. Daikal thlengin thil a ti awlsam. Ei tam a tha hle.

























Chawei kham lama 'kawdam' tur pawh kan thar ve zel chu anih hi. kum 2011-12 zet phei chu Mizoram in serthlum kan thar tha a, ka pian a hnu lama serthlum ka la ei tam ber kum a ni hial in ka hria. A lian tha pem pawm hle, ka kutzungpui hi a lian ve thawkhat fu ania aw!




Balhla pawh hi kan rama kan neih ang hi chu duhthusam a ni ringawt mai.
A kunga a han hmin eng tak mai phei hi chu aw, hnamdang te hian an it thei thin teh a sin.






















A duh tan chuan fu thlengin a in tung thut mai. Fu tial chang fan thlarh mai han feh hi chu nuam ve tak a ni. Fu hi chaw tha bawm an ti tlat pek a, a hman na kan la hriat tlem vang te pawh a nia nge. Fu tui leh a chu ta tang a thil siamchhuah te chu ..... han sawi zawm ve mai teh khai. Fu hi phelsep tah behchhan in han tlar fur mai sela te ka ti rilru a.





















Hei hi kan sawi nasat em em 'Oil-palm rah chu a ni, taima taka bei chuan hlawhtlin pui mawlh rawh se tih hi ka duhthusam a ni.






















Bonsai, Siam leh enkawl ka peih hauh loh, ka duh ve em em si, hmuhnawm chi khat hi a ni ringawt mai. Taima taka bei tu te tan a eizawnna tling a ni tlat, ka fak khawp mai. A man pawh a to talh mai.


Heng bakah hian pangpar chi hrang hrang, rubber, silk worm, thlai chin na hmanrua leh khawl hrang hrang te entir a ni bawk. Heti lam kawnga eizawng tan chuan bengvarthlak tak a ni. Kei pawh silk siam dan ilo zawt chiang in darkar chanve dawn ngawt ka khawtlai ta a nih kha.








A tawp nan, hei hian he exhibition hi a khaikhawm thei maiin ka hria.



"Hnathawk lo chuan ei pawh ei suh se", a tih ang khan rim taka thawk chuan a thawh rah seng chu a phu hliah hliah a ni. Midangte thawhrimna zar zo in hriselnan a tha thei leh thlai te mahni inchhung limah kan ei thei ta anih hi.

Chaw ei tui u le.

...khrum

Tuesday, December 27, 2011

Kawla nichhuak chhiarin.

Krismas chibai inbuk nan khua a tlai ta, kumthar chibai ka hlan a che u; ka thiante ho. Pathian zarah dam ten kum 2012 chu kan thleng leh ngei turah i ngai leh phawt mai ang. Kum thar, hun thar hi mihring hlui hian nun thar nen a hman kan tum leh a ni dawn si a.

Khawvel mihring nihphung in a ken tel 'new year resolution', siam tur ngaihtuahin kan rilru suangtuahna a vak vel ruai ngei ang. Thil tha tak a nih laiin mi tamtak tan chuan boruak a kulh ropui sak ang a ni ve chawk thin, chu erawh chuan i tumna kha hnualsuat tir suh se.

Kum thar thutiam siam hi ka peihna, tumna leh taihmakna hian a tlin ve tlat si loh avang hian ka siam ve ngai lo va, amaherawhchu tihian ka ti thin: kawla nichhuak chhiar a insiam that ka phak chinah ka tum ta zawk a ni. Hetia tih hian bawhzui pawh a nuam a, mi a phuar tung lova, kan thlen chin apiang a rahbi khat lek sawn pawh kha hlawhtlinna a ni chho zel a ni. Kulh ropui vawi lehkhata din tum lovin, a ban khur tur nitin a bawngtuthlawh cheh khat lek lek thawh hi ka phak tawk leh ka thiam ve dan a ni.

Ka thian, Pathianin hruai che sela kumtharah hian i thiltum leh ruahmanna te chu tih hlawhtlinsak ngei che rawh se.

kumthar chibai le.

...khrum

Wednesday, September 14, 2011

KA ADDICT REI LO A SIN MAW LE!

“A, tunhma lam kan tleirawl chhoh lai a kum hnih khat emaw chhung lek ka inchiu ve thin bak kha chu ka inchiu tawh ngai lo”, an ti tlangpui. Nia a dik reng a ni, tleirawl at lai, nge ni a sual lai a mahni duh vang reng a, a hman dan lo tur leh a hman na lo tur a an hman damdawi rawt dip thlitfim a an inchiu thin avang a Mizoram pum in kan buaipui luih luih mai kha ‘Drugs addict’ tiin kan hre thin. Hun a lo kal a khawvel a thang zel a, a hming te pawh an thlak zel chu a ni. A lo ti thin te pawh an inchhira, an khawngaihthlak reng bawk a ni.

Hnam leh khawtlang kan thang a, chhungkua leh YMA kan tang tlang a, he sualna thlipui hian kian lam a pan tan deuh emaw ni chu aw kan ti ta deuh pawh a ni maithei. Nimahsela, an seilen lai a thlipuiin a nuai fo thingkung te chu an zia a herh kumkhua, kan ti ang deuh hian, thalai nun hi ruihhlo thlipui hian nasa takin a nuaiin a ti khawlo zui thin a ni. Kan hre awm e; HIV-AIDS, Hepatitic B/C, rilru lam buaina, pianphunga rualban lohna, ldt. Heng te hi kan hre tlang lawn hle, tlem a nitin nunkawng, nunphung leh hriselna lam kaihhnawih lehzualte kan sawi zuai zuai teh ang.

Kut leh ke a vung ber bur a, a mawi lo; chu chu kan hria, mipui mimir pawhin eng teh vakah kan ngai lova ngaiah kan nei tawh ni awm tak a ni. Heng kut/ke vung ber bur te hian a tuartu nun a tihrehawm hle a ni. A rit a, a khawng a, nitin nunphunga chetvel a ti harsa a nasa takin an nun a ti thuanawmp a ni. A lan mawi lohna kha chu khuh boh theih a. Chet khawrna leh midang ruala pen ve theihlohna erawh ‘pianphunga rualbanlohna’ a ni ringawt mai. Pem, pan leh tawih ringawt bak hi a tam a ni.

Hetiang kut ke vung ber bur te hian hliam an tuar hma a, awlsam te a hliam theih an ni. Va intihpalh leh accident bur kher pawh a ngai lo. Ho te te ah a pilh in a vun belhchhah a, nasa taka punlun in chu chuan vung reh theih lo, tur ut ut a na leh hnai la (septic) te in a chhuah thei a ni. Chutianga a lo awm chuan enkawl dam harsa tawh tak a ni. A tuartu tan lah hrehawm namen lova nasa a lo ni bawk si.

Engvang a chutia lo awm mai bik nge ni le? A hman loh dan tur leh hman lohna tur a hman anih avang khan damdawi khan thisen zem leh zam tesep (lymphatics) te a tichingpen zova, khalai taksa bung bik a thisen kal dan tidanglamin a ti khaihlak zova, chu mi chu taksa in lo siamthat a tum na lamah phuartu har (fibrosis) a lo insiam ve leh zel a, chung chuan thisen kaldan a ti danglam lehzual thin. Chutah meuh chuan khalai taksa peng bik kha chu saum tho hlim ang mai; ruh, tihrawl, diarduar, thisenzam leh thazam leh vun kha taksa tuihnangah khan a inchiahpuam ul thin ta mai a ni. Chu chu taksa nihphung pangngai ni hek lo le, hman rim emaw, thlah zal lutuk emaw, tihpalh zeuh chuan a vung a zual a, thisen hnianghnar ta lo chu a tihtheih chhiat lehzualna lam a pan ta mai thin a ni. A rahchhuah chu thihna a ni fo thin. Chu mai a la ni nang; kap, zak leh nghawngah te an lo inchiu tawh anih phei chuan kut ke lama thisen lutchhuak ve thei chhun te kha khing lai check pointah khian tlang zo lovin khuarkhurum mawng nei lo chhawng hnih a tla ang hlauh a chanchhia an ni ta mai thin a ni.

Insawithaihna lam pawh a ni lo bawk a sawi zel teh ang. Hetia kutke vung cher chur te a lo pun a, panchhia damthei lo meuh a rawn chhuah chuan a dam har em em mai lehnghal a, a tuartu tan chuan JOBA tia hming thlak mai pawh a chakawm rum rum ta ve ang. Thisen kalphung leh saum bur a chiah ang mai a lo nihtakah chuan, tisa pangngaiin hliam leh pem tidam tura hma a lak ang khan thapui a thawh thei ta si lova, rei tak, hrehawm taka tawrh hnuah hmel mawi lo zetin a damchhuak ve mial hlauh thin chauh a ni. Chumi chhung zawng chuan; sum, hun, tha leh zung leh rilru ngaihtuahna chhiarsen leh tlem sen angai thin a ni. Vanneihthlak taka a lo dam pial anih chuan a hmabak chu fimkhur zawka inenkawl leh invawn uluk a ni. Rilru lama inthlahrunna leh sum lam harsatna ten a lo tlakbuak phei chuan, an nun a khawngaihthlak thei hle a ni. Vun ser leh duk cher chur te leh zungtang chhum bung leh her tlei tlui te chu ka sawi kai tawh lo mai ang.

Aw le, a tira ka sawi ang khian drugs addict tih leh HIV..... etc tih hi chu kan hre fur, ninawm khawpin kan tlangaupui. Chumi piah lamah chuan nasa takin nun leh hriselna a nghawng a, sum pai a khawrh a, nunphung a tikhaihlak a, hlim-lawm a ti khingbai fo thin. Kan ramah ruihhlo hmansual a nep chho a kan ngai anih pawhin, a lo ti tawh thin te zingah heng harsatna leh a bak te hi a awm chho zel dawn tih i hai lovang u. Chu chu hria in kan thalaite; kan tu leh fate hi nasa takin ruihhlo hmansualin a ken tel harsa kan hriat leh hriat lem loh te laka fihlim thei turin tan i lak thar pui teh ang u. Chu chu ka thupui a ni, a la tlai lo, tlai erawh a tlai tep a ni. Tawp thut teh ang.

Ka lawm e.

...khrum

[kan hotuten post an tichhuak tha duh lo nge ni, ka lo tichhuak chhen mai teh ang.]

Saturday, September 10, 2011

NANG ENG ANG MI NGE I NIH LE?

Hriselna lam kawngah hian mitin mai te hian mahni tan a chakai khawrh in mawh kan phur a, chutih rual chuan sorkar leh a changtu department ten thui taka hma la in mawhphurhna lian tak an in tuk bawk a ni. Ram, hnam, khawtlang, chhungkua leh mimal tin te kan lo hrisel zawk nan kan chanvo leh mawhphurhna theuh te kan ngaihpawimawh a kan hlen hram hram a tul hle a ni. Hmalakna tur kawng sawi sen loh ( chhiar chhin ta i la zawng, sawi sen a ni leh mai ang) a awm rual in ka ngaihmawh deuh thenkhat kan tarlang ve teh ang.

Thawnthu: Kan natna leh nat dan kalphung hi thawnthu ang a ni. Thawnthu ngaihnawm chuan chhiar kan mai mai tur thu a pawi ngai lo. Chutiang bawkin kan natna/insawiselna inkhaidiat chhoh dan hi tawi fel leh fawmkim tak a sawithiam hi a pawimawh a, inentir tur chuan lo inpuahchah lawk thin hi a pawimawh hle a ni. Sorkar hospitalah te phei chuan damlo pakhat tan hun rei tak tak sen a lo har thin. Chutih a kar a, 1978 zirtawp tlai a ruah hmi seng seng do atanga tan chhoh te hi, kan natna nen a inkungkaihna ril tak a nei a nih ngawt loh chuan sim a tha (hetiang mi hi tunlai chuan an tlem tawh khawp mai). Chu thawnthu chuan natna intan dan, in tan hun, a zual nge a ziaawm, enge ti nep a ti zualkai leh a kaihhnawih theih awm a kan hriat theih te kimchang tak leh tawi fel takin a fawmkhawm thin tur a ni. Han zawh a; ‘a rei tawh mai’, engtia rei tawh mai nge?, tih a ka hre chiah tawh lo tih mai mai thin te hi chin lo a tha. Hriat loh chuan, ka hre tawh lo tih mai a tha in ka hria.

Tawng: a bikin tunlai tleirawl leh rawlthar te hi thian zaho a an awm chuan an ri chel chul a, an inentir a thil han zawh erawh chuan hriat theih mang loh a tawng leh hawl ral mai mai an ching hle. Ka lo chik ve deuh a, mawngtam thep kekawr zuih tit tet ha mipa leh hmeichhe make up hmang nasa zingah a hluar lehzual. I fate leh unauten chutiang chu an chin chuan i lo zilh dawn nia. Inentir na mai lo; interview, puipunna leh mimal bil bik a chanvo an neih ve na ah te an ching dawklak a, an personality thlenga hnuk hniam thei ‘zia’ a ni tlat a ni. Thanglai an ni a, puitlin lam kawng an zawhnaah a hun leh hmun mil a tawngkam fiah, mawi leh zangkhai hman hi an zir a ngai a, tul pawh a tul bawk a ni.

Thil vawn that: Kan natna vang a kan inentir tawhna leh test chi hrang hrang result vawn that hi kan ngai pawimawh tawk lo hle ni in a lang. Hrilh mawlh mawlh chung pawh hian kan theihnghilh lui thin emawni tih tur hian ching dawklak kan awm tlat thin. Heti lam kawngah hian hnamdang kan tluk lo tlat thin. Medical records hi document pawimawh tak a ni a, vawnthat khiau thin tur a ni. Sorkar hospital angah te chuan doctor ngai hlir khan an lo en thei tawh thin lova, a lo en hnuhnawng zawk tu tan khan thil zawh vak ngai lovin record/lehkha hmasa en khan thil tamtak a chiang sa mai thin. Damdawi huat zawng te, ngeih loh te leh natna kalphung; a ziaawm nge a zual zel tih te pawh hriat mai a awl thin. Lehkha hlui keng si lo, ‘eng damdawite nge i ei tawh a?’ han tih a sawi thei bawk si lo te hi kan kat nuk thin. A ngeih loh damdawi chawh nawn leh mai te kha a awm thei, doctor thiamlo nih mai kha a awl viau dawn a ni. Chuvang chuan tangkai thei tur a kan ngaih ang chi kan natna in a kaihhnawih lehkha an chi hi chu in pawm bawr luk mai pawh a pawi reng reng lo.

Check up: ennawn leh tur a koh hi chhan nei a tih a ni thin. Mi tamtakin kan ngai pawimawh lo a, kan tuar phah zek thin. ‘Ka zia ta deuh a’, ‘Kan thenawm ten mo an nei a’, tih avang ten kan inentir leh hun kan bawhpelh duai duai thin. Natna benvawn leh enkawlzui ngai ah te phei chuan pawi thui thei tak a ni tih hria ila check up hun hi ngai pawimawh thin ila a duhawm hle a ni.

Thuawihna: hei hi a pawimawh a, nun kawng dangah pawh sawi nawn fo ngai lo khawp a hriat sa a ni. Damdawi ei lamah chuan thu kan awih viau thin. Inenkawlna dang, tih tur leh tih loh tur lamah hian kan taima tawk lo fo. Khup exer, zing leh tlai a vawi 50 tal ti tur a tih pawhin vawi 20-25 bak te kan ti peih lo va, thla khat tih chu sawi loh kar khat pawh kan peih ngut lo thin. Pathian pawhin mahni intanpui te chu a pui thin kan tih ang hian, taima leh thuawih takin kan tan a tha turah chuan beih fan fan lamah ram i tang thin ang u.

Thildang sawi tur tamtak a awm ang. Kan ngaihdan pawh a inang vek kher lo ang. Ka thil vei thenkhat ka han thai lang ve mai a ni. I hriselna vawnthat kawngah khan nang eng ang mi nge i nih a, i nih zel dawn. Tan la a insangmar duh tan hun a la awm e.

Ka lawm e.

...khrum

Monday, September 5, 2011

LUSUN KHAWHAR THU

"He lei ram mi kan ni lo..........., he lei ram mi kan ni lo”, tiin kan zai a, kan su dual dual thin. Nimahsela thihna kut vawk in kan thenrual tha te min han then tir meuh chuan a boruak a dang zar mai. A tak a tuartu nih ve ngawt loh chuan hriatthiam a har hle thin. Midangte lusun khawhar te hi ka hriatthiampui tawk tak tak thin awm lo ve te ka in ti hial a ni. Tun hnai mai khan ka mi hriat hnai tak pahnih in chatuan ram min pan san a, anmahni sun nan tun tum chu special takin post kan siam ve reng reng teh ang. An hminghmerh in thutawi tlem han ziak i la.

Upa ZATAWNA FANAI PAKHUP: Kum 92 mi niin 29/8/2011 chawhma lam khan chatuan ram min pan san ta. Pu Zatawna hi kan nu pu a ni a, thisen a inzawmna kan nei lo. Mi a ti makpa in a tu leh fa leh makpa dangten min thik ang tih tur khawp hian mi a ti chhungkhat in kan inhnaih hle a ni. Kum 7 vel zen zawn chu kan inhre ve a, pa kawmnuam tak leh nelawm tak a ni. Pathian tih mi leh tawngtai mi tak a ni a, a bula awm a nuam hle a ni. Mi a tawngtai sak peihin Pathian pawhin nasa takin a tawngtaina te mal a sawm thin. Pa inngaitlawm tak a ni a, taimak pawh a taima a kum 90 hnu lamah pawh khawhar in kalte a peih hle thin. A nun atang zir tur tam tak ka hmu in ka hria. Zirna ngaisang mi a ni a, zirlai ti tha leh taima te fuih peih tak a ni.

A hna lamah chuan zirtirtu niin pension thlengin zirtirtu hna a thawk a, National award for teachers pawh 1978 khan a lo dawng daih tawh a ni. Kum 1970 khan assam state awards for teachers a lo dawng tawh bawk a, mizo zingah phei chuan hetiang dawng awmchhun hi a ni. Thisen sang leh upat lam natna hrang hrangin tlakbuakin, Christian hospital serkawnah thla khat zet a awm hnu in chatuan ram min pan san ta a ni. A thih ni hi ka birthday a ni a, Pathianin amah kan theihnghilh tawh ngai loh na turin a ruahmanah kan ngai, kan lawm nil eh hlimni pawhin kan “PU” hi kan hre reng tawh dawn a ni. Tu leh fa 31 zet a kalsan a ni.


Pu RICKY LALRINLIANA: Ka second cousin a ni, kan ni fapa a ni. Kum 35 mi niin 4/9/2011 khan mual min liamsan ta. Naupan lai atang tawh a unau ang a awm leh inhre thin kan ni. Pa tawng tlem leh mi pawisawi lo, khawtlang leh kohhranah pawh thahnem ngai tak a a phak ang chin chin a inhmang thin a ni. Rickya hi kan unaupa leh thian tha tak a ni. A bik takin kan nupa chuan kan ui em em a ni. Mitthlaah kan inneih ni a mi a lawmpuizia te leh mi a tanpui nasatzia te a lang a, kan ngai hle dawn a ni.

“Whom God loves die young”, an tih hi a dik ang ka ti hial a ni. Midangte tan a inpe zo leh tanpui tur a inpeih reng thin a ni a serkawn hian mi hlu tak a chan a ni ka ti lo thei lo. A nupui leh fapa pahnih bakah a chhungte leh thenrualte, amah ui em em tu te hun lo takah min kalsan ta a ni. Thihna hi chu a tawp hle mai, keini chuan a hun lo kan tiin kan la phal thei lo, nimahsela a rawng a bawlsak Lalpa chuan a hnena thlamuang taka chawl turin a ko ta si a, ui hle mah ila kan chelh ding zo ta lo a ni. Khawvela natna hrehawm tuar tur a mahni hmasial taka chelhdin kan tum kha a hmangaih Lalpa chuan a phal lul lo a ni. A nupui fanaute tan thlamuanna dilsak mai lo chu tih theih reng kan nei ta lo. Hlimten vanah kan la intawk leh ngei ang, Lalpa angchhungah ngei chuan.

"Zuapa tel lo chuan tlaini len kan zuan nem le, lunglai her in lo kir leh mai rawh"

JL Chongthu.

...khrum

Saturday, September 3, 2011

ASCLEPIUSa TIANG


Midang ngaihdan enge ka hre ve lo va, an ngaihdan pawh ka zah khawp mai, ka ngaihdan erawh hetiang hi a ni thung, tiin kan tan ve thuai mai teh ang.

Tun hma lam khan doctor ten kan vehicle ah red cross kan tar thin a. Hun enge maw lai atang khan red cross tar kha red cross society leh war time activities tih lovah chuan tar kha an khap kha a nia, kan tar ta lo reng a. Tunah hian doctor te hian kan vehicle ah doctor kan ni tih lantir nan sticker kan tar ta thung a ni. Chu milem chu Asclepiusa tiang a rul invial hi a ni. Motor hma/hnungah kan tar fur a thenkhat te phei chuan a inchhawngin pahnih te pawh an tar a ni awm e. Chutiang bawkin advocate ho hian an profession symbol hi an tar ve bawk. Hetia chhinchhiahna tar hi a tul ber em aw tih hi zawhna pawimawh tak niin ka ngai a, tunlai phei chu ka ngaihtuah fo mai.

Hetia kan nihna kan motora kan tar hian a lantir chu a chiang sa; zawh buai ngai lovin midang ten kan nihna awlsam takin an hre mai a ni. Chu chuan kawng hrang hrangin remchanna a siam thin. Khawi lo kalna leh chhuahvah naah te pawh chet a awlsam phah hle thin. Rambuai deuh leh sipai lalna hmunah te phei chuan hetiang sticker bel hi ‘pass’ pawimawh tak a ni a, tangkai takin a hman theih bawk a ni.

Mizoram, ram ralmuang angah te chuan chutiang taka a tangkaina erawh a awm kher awm lo ve. Midangten kan nihna an hriat nan, sawi lovin kan nihna kan puanchhuahna hmanrua mai a ni. Mimal takin a tul na vak ka hre ta hauh lo mai, ka ngaihdan erawh a dik vek kher lo maithei bawk. Kan hnathawhna hmunah chuan motorah vehicle pass sticker kan tar tho va, doctor kan nihna sticker kha tar kha a tul tawh hranpa lo. Chuti a nih si chuan bel ta lo mai ila ka ti a, tunah chuan bel ka tum ta lo. Ka nihna chu ka hnathawhna hmunah zawh hrangpa ngai tawh lovin tangkai takin hmang ila, a bakah chuan midang ang tho a huang khata inhrutrual kha a tha maiin ka hria.

Ka ngaihdan hi ka thawhpui dangten an tawm kher lo maithei, tawm tur pawhin ka phut lo a, a dik ber pawh ka ti chuang lo, ka tan chuan a dik ka ti mai a ni. Midang ten an tar zel dawn a, chu pawh chu an tan chuan a pawi ka ti chuang lo, mahni duh dan theuh a kal mai kan ni. Dan leh sorkarin thuchhuah hial siam a tar tur a beisei kan ni tih leh tar ngei ngei tur a min ti te a la nih ngai chuan tar erawh kan la tar leh a ni mai ang chu. Chuti lo zawng, thiam bik nei chi tin mai hian kan hna bil bik chhinchhiahna hi kan la tar fur mai ang te ka ti mai mai a.

In ngaihdan enge le.

Ka lawm e.

J L Chongthu.

...khrum